روايه غزاله الشهاب بقلم دعاء احمد
شهاب:- صدقني مش عارف يا جدي أنا الغفير كلمني من ساعتين وقالي أنه لقى الباب مفتوح وكأن حد فتحه ليها بالمفتاح عادي وان حتى القفل مش مكسور ولما روحت اتأكد من كلامه بس أنا مش فاهم مين ممكن يكون ساعدها تهرب.... المفاتيح بتاع المخزن في البيت هنا وأنا اتأكد أن كلهم موجودين ودا معناه ان حد عمل نسخه عليه
الحج محمود سكت وهو بيفكر
قاسم:- هي ممكن تاذي غزال؟!
شهاب:- والله واحدة زي دي توقع منها أي حاجة
الحج محمود:- مظنش ان في منها أذى... صباح أنا عارفها مش هي دي صباح بتاع زمان... بس مين اللي هربها وهي فين دلوقتي؟
شهاب شك في غزال ان ممكن هي اللي تكون عملت كدا لانها طلبت منه انه يخرج والدتها من مدة قصيرة لكنه رفض... سكت ومتكلمش
الحج محمود:- مش هنفضل قاعدين كدا
أنت يا قاسم قوم افطر وروح شغلك وأنت يا شهاب عايزاك تعرف لي مكانها
و أنا هحاول اعرف بطريقتي ياله كل واحد يشوف هيعمل ايه...
شهاب قام مع قاسم وخرجوا الاتنين وشهاب بيفكر هل ممكن غزال تاخد نسخة من مفتاح المخزن ومين ساعدها وخرج صباح بليل من المخزن بس حاول يفكر في حد تاني لان مستحيل تقدر تعمل كدا ولو هي اللي عملت كدا مستحيل تبقى بالهدوء دا وكان هيبان عليها الارتباك والتوتر.
طلع اوضته لقاها لسه نايمة استغرب لان الفترة الأخيرة بتنام كتير... قعد جانبها باستغراب:غزال.... غزال أصحى
قامت بكسل وبصتله: صباح الخير
-صباح النور.... غزال انتي كويسة... بقالك كم يوم كدا مش مظبطه نومك.. ومش عايزاه تاكلي... أنتي كويسة
غزال:- اه كويسه بس شوية تعب عادي.. هو فيه حاجة أنت صاحي من بدري ولا اي.
شهاب:اه.... في حاجة كدا حصلت
غزال:حصل ايه متقلقنيش
شهاب:لا مټخافيش مش عايز اي حاجة تخوفك.... صباح حد خرجها من المخزن وهربت
غزال:امتى الكلام دا؟
شهاب:امبارح بليل... غزال أنتي ليكي علاقة بالموضوع دا... قوليلي ومټخافيش أنا مش هعملك حاجة بس لازم اعرف.
غزال:أنت بتقول ايه... أنا معملتش كدا
اه كنت عايزاك تسيبها تمشي بس أنا والله معملتش كدا وبعدين أنا امبارح كنت تعبانه ازاي هخرجها ولو فكرت ان ليا حد ساعدني
ان والله معرفش حد... صدقني مش أنا
و لو عملت حاجة زي دي هقولك لاني مش خاېفة منك
شهاب:طب اهدي أنا مقصدش حاجة أنا بس بسأل.... وبعدين كنتي تعبانة مالك ومقولتليش... حصل اي؟
غزال:- مفيش حاجة تستاهل اني اقولك عليها اصلا
ضهري كان بيوجعني شوية وكان عندي مغص...
شهاب:- طب ودي متستاهلش ازاي يعني... قومي غيري وتعالي نكشف ياله
غزال:- شهاب مفيش حاجة أنا كويسة...
شهاب:طب ياله قومي علشان ننزل نفطر سوا
غزال قامت وهي حاسة بالارهاق وأن جسمها بيوجعها...
بعد وقت طويل
شهاب كان خرج وراح شغله وقاسم كمان
حليمة كانت في اوضتها، الحج محمود خرج
غزال استغلت ان مفيش حد وقامت غيرت هدومها وراحت لاوضة هند
-هند بقولك تعالي نخرج
هند باستغراب وهي بتقفل الموبيل:نخرج نروح فين؟
غزال:- انتي مش فاضية
هند:بصور فيديو شرح انتي عارفة دي اخر مادة وخلاص بعد بكرا امتحان تالته ثانوي ولازم انزل ليهم الفيديو دا في كم بنت قالت لي انهم عندهم مشكله في النقطة دي ولسه عايزاه اكلم معتز كان عايزني اكلمه بيقول في موضوع مهم للأسف مش فاضيه خالص.
غزال بابتسامة:- خلاص مش مهم... هروح أنا
